Cynllunio iaith corfforaethol
Beth yw ‘cynllunio iaith corfforaethol’? Yng ngyd-destun y Gymraeg, rydym yn defnyddio’r term yma i gyfeirio at gynllunio ieithyddol o fewn sefydliadau. Mae’r gwaith hwn yn ymwneud â chynyddu defnydd y Gymraeg a dwyieithrwydd wrth ddarparu gwasanaethau ac mewn gweinyddiaeth fewnol. Yng Nghymru mae mwy na 550 o gyrff cyhoeddus, ynghyd â nifer fawr o gyrff gwirfoddol, eisoes yn gweithredu Cynlluniau Iaith Gymraeg. O 2015 ymlaen bydd cyrff a ddaw o fewn cwmpas Mesur y Gymraeg (Cymru) 2011 yn wynebu’r her o fabwysiadu a gweithredu Safonau Iaith Gymraeg.
Fel y cyntaf i ddatblygu'r maes proffesiynol hwn mae profiad IAITH o ddarparu gwasanaethau cynllunio iaith corfforaethol heb ei ail. Mae prif sefydliadau cyhoeddus Cymru, gan Gynnwys Cynulliad Cenedlaethol Cymru, Llywodraeth Cymru, awdurdodau lleol amlwg, cyrff gofal iechyd a gofal cymdeithasol, Heddluoedd a chyrff eraill yn y sector gweinyddu cyfiawnder, Awdurdodau Tân ac amryw o gyrff eraill ymhlith ein cleientiaid.
Rydym yn cynnig cyngor ac arweiniad ar bob agwedd ar ddatblygu dwyieithrwydd corfforaethol:
- datblygu dulliau gweithredu a systemau a fydd yn helpu cyrff i gydymffurfio â’r Safonau Iaith Gymraeg
- hwyluso gweithrediad Cynlluniau Iaith Gymraeg ac arfer dwyieithog da
- darparu hyfforddiant ymwybyddiaeth iaith i reolwyr a staff
- darparu hyfforddiant a chyngor ar faterion recriwtio a phenodi
- Strategaethau Sgiliau Iaith
- cynnal awdit sgiliau iaith
- prif-ffrydio'r Gymraeg
- datblygu gweithleoedd dwyieithog
- llunio canllawiau i staff a briffio staff
- llunio strategaethau hyfforddiant
- gofal cwsmer a'r Gymraeg
- y Gymraeg a'r cydraddoldebau
- sefydlu a chefnogi Swyddogion Iaith
Rydym hefyd yn datblygu a gweithredu nifer o brosiectau arloesol ar y cyd â'n cleientiaid, gan gynnig atebion dychmygus i anghenion penodol. Am restr enghreifftiol o weithgareddau cyfredol IAITH yn y maes hwn cliciwch y cyswllt hwn.
Bydd Dr Steve Eaves yn falch o drafod eich anghenion yng nghyswllt unrhyw agwedd o ddatblygu dwyieithrwydd corfforaethol. Rhowch alwad ar 01745 222 052 neu anfonwch neges e-bost ato: steve.eaves@iaith.eu